لباس
منجھلی گٹیاں کولوں اتے کجھ ،،کنجنڑ دی وجہ توں ،کُجھ سُنگڑ کے خود اتے تھی ویندی ہائی ،،پُلکاں آلا چولا کھلا کھلا ،
سر تے نکی جئی پٹکی ،جیکوں اکثر لوک ،،صافہ سڈیندے ہن ،گُنجڑی ہوئی ت میلی کچیلی ،جیندے نال ،نک وی پونجھ گھندے ہن جٹ ت ہتھ منہ وی پونجھ گھندے ہن ،،ایہو جوان دی پگ وی ہوندی ہائی ،،
پیریں ٹھُلی کنیالی جتی چمڑے دی ،
جیڑھی کئی کئی سال پیراں ویچ گھلیندی ہائی ودی ۔ موچی کولوں تروپا ٹاکی لوا کے یار گھیلی رکھدے ہن جے تک اصلوں ،نا مک ونجے ہا ،،
بچایا سدھا سادھا ت بیبا بندہ ہا ۔بٹیل ت خوش خوراک ۔ہاسے مزاق دا شوقین ،پر ہک عجیب مسئلہ ہائی اوکوں ۔جو زری ہک تھندی انگل ڈیوو ہا چا، بس ول او پُھل کے ڈڈا تھی ویندا ہائی ۔
بھاویں جو دنیا اِڈوں دی اُڈے تھی ونجے ہا او جوان ،ٹس توں مس نا تھیندا ہا ۔۔
مامے میڈے ہن زری شریر طبیعت دے عمر وی چھرقی دی ہانیں ۔روز کوئی نا کوئی نویں انگل چاڑھی رکھدے ہن او بھلے مانس بندے کوں ،،
ت او وی ایڈا کملا گاہلا ہا روز روز دی شرارت کوں وی نا سمجھدا ہا ۔۔
ہک ڈینھ ڈوپہراں کولوں زری بعد ایچ پیشی دے ٹائم کولوں زری پہلے ۔
ویچلے مامے خادم شاہ نکے مامے نال نویں شرارت دی صلاح کیتی جو اج بچائے کو نویں ،تھندی انگل چڑھاؤں ت چس چاؤں۔
ڈوہیں بھرا اے صلاح کر کے ۔بچائے کوں ولا چاڑھن ٹر پئے ،
او غریب گھاء ودا کپیدا ہا ،،ڈھاندھیاں کیتے ،ونجنڑ سیت نکے مامے ویچلے کو اکھ نال اشارہ کیتا جو ولا شروع کر ،
مامے خادم شاہ بچائے دوں منہ کر کے بظاہر نکے مامے کوں کھل ت آکھیس یار،
اج بچایا رات دا ٹُکر (کھانا ) کینا کھاسی بھاویں توں پیریں ڈہھ پویں ،جوان ضد دا پکا اے توں من یا بھاویں نا من ،
اگوں نکے مامے ولدا ڈتا ۔۔کیوں بھئی ،بچایا روٹی کیوں نا کھاسی ۔ایندا کوئی رڑھ (فوت ) ت نی تھی گیا ،جو ستھر وچھا باہسی ت ٹکر کینا کھاسی سوگ ایچ ۔
مامے خادم شاہ آکھیا ،
بس کینا کھاسی مرضی اوندی تیڈا پابند دا نی جوان ۔
بس ایہو تھندی انگل چڑھ گئی جڈاں بچائے کوں او وہ اگوں ڈڈا تھی کے بولیا ،ہا کینا کھاساں اج شام دا ٹکر بھاویں سیجھ، سجھ ابھار دوں ونج لہہ ( یعنی مشرق میں جا غروب ہو سورج )
میں کینا کھاساں روٹی ،،
ہنڑ نکا ماما منتاں کرے پروگرام دے مطابق ہمدرد بنڑ کے ،،
جو توں خادم شاہ دی نا من اے تیکوں ۔تھندی انگل لیندے مویا ،مفت بکھ مرسیں ساری رات میں تیکوں سمجھیندا پیاں ۔۔
اگوں ماما خادم شاہ متھے دی مصنوعی تریوڑی پا کے ول تھندی انگل چاڑھے ںچائے کوں ۔۔ت نکے مامے کوں آکھے ،،
ووئے توں بچائے کوں سمجھدا کیا ہیں ،،کوئی چوڑھا مصلی ،،
ووئے بچایا نر جوان اے ۔مر ویسی پر اپنڑیں قول توں کینا پھرسی ،،ڈیکھ گھنیں ،،
ہیں بحث تکرار ایچ گھاء چاء کے گھر پج ونجن ہا ۔ت ویندیاں سیت ۔۔
بچایا نانی اماں کو آکھے ہا ۔۔
اماں میں رات دا ٹُکر کینا کھاساں ۔نا پئی پکاویں ،،
نانی اماں کوں پتراں دے کرتوتاں دا پتا ہوندا ہائی سمجھ ونجے ہا جو اج ول ایکو خادم شاہ کوئی انگل چاڑھی ہوسی تھندی کر کے ت اے مویا ،،ہنڑ پھل کے ڈڈا تھیا ودے ،،
نانی اماں سمجھاوے ہا ۔۔وے مویا اے چھوہر تیکوں چگل بنڑینن ،وے ناں گیا توں مفت انہاں دی تھندی انگل دے چڑھ وینیں ،اوے عقل کوں ہتھ مار،،ساری دات بکھا سمسیں ،،
اگوں بچایا پھاتے بلے دی کار خادم شاہ کوں وی ڈیکھے ہا ت نانی اماں کوں وی ڈیکھے ہا ۔جینیویں رات دی بکھ ت ،اپنڑیں قول دی عزت کوں تلیندا پیا ہوے جو کیندا وزن ودھ اے ۔ماما خادم شاہ اوکوں ششو پنج ایچ ڈیکھ کے ولا تھندی انگل چاڑھ کے بظاہر نانی اماں کو آکھے ہا ۔۔
اماں تساں ایکوں نیہوے سمجھدے ۔
بچایا مر ویسی پر اپڑیں قول کوں پورا کریسی ،
قول دی حفاظت کرنا مرد دی شان ہوندی اے اماں ،،
نانی اماں تکھی نظر نال مامے خادم شاہ کوں نال نکے مامے کوں ڈیکھے ہا ت ڈوہیں منہ پھیر کے کھل کولوں تربُٹ تھیون ہا ،،
نانی اماں ول سمجھاوے ہا بچائے کوں ،
ڈٹھی وے چگل آ اے چھوہر تیکوں بے وقوف بنڑیندے پئن ۔
ہو ش کر چگل نا بنڑ
۔پر بچایا اوں ٹائم تک وزن کیتی کھڑا ہوندا ہا جو چھوہراں دی نظر ایچ نمھی گردا ۔۔اے کیا آکھسن جو بچایا اپڑیں قول دی حفاظت نی کریندا ،،
بچائے کوں اے سمجھ دا نا آندی ہائی جو میں دا کوئی قول نمھی ڈتا ۔۔اے دا خادم شاہ میڈے منہ ایچوں زور نال اپنڑی چلاکی نال قول کڈھوائے سی ،،
بس بچایا ہتھ کھڑا کر کے نانی اماں کو آکھے ہا بس اماں میں روٹی ۔نمھی کھاندا اج رات اے میڈا آخری فیصلہ اے بھاویں میں مر ونجا پر ٹکر دا ہک بھورا وی نمھی کھاونڑاں ،،
ول ساری رات گزر ونجے ہا بچایا شودھا بکھا بھانڑاں رات کٹ چھوڑیندا ہا ۔۔حالنکہ جوان بہوں کھووقل ہا ،،(خوش خوارک)
یعنی ہک تھندی انگل دے چڑھ کے مفت بکھا سمدا ہا ساری رات
غور کروں ایمانداری نال ت اساں وی کہیں نا کہیں تھندی انگل ت چڑھے ودے سے ،،چاڑھن آلا بھاویں کوئی ہووے ۔قابل غور گاھل اے ہے جو اساں چڑھدے کیوں ہسے ۔۔تھندی انگل ت
🖊️فیاض بخاری