ڈاڈا پوترا

 ہک ویلا ہا جڈاں ڈاڈے پوترے دی 

 پیؤ پتر کنو ں وی ودھ سنگت ہوندی  ہائی

ڈاڈا ڈاتری اجاں گولیندا ودا ہوے ہا ،ایڈوں پوترا فٹ کانے دے گھوڑے کو چھوڑ ڈاڈے دے سر تھیوے ہا ،

اتے جیویں اوٹھ کو ہشیندے  سے(مطلب بٹھانا اونٹ کو)...

اینویں ڈاڈے کوں پوترا بلها تے بوڈے آلے.. لم آلے نک سمیت... پیروں ننگا کہیں کہیں ویلے اصلوں منجھوں ننگا ، ڈاڈے دے مونڈہے تے چڑھ ونجے ہا 😘

ول  ڈوہیں ڈاڈا پوترا  گھاء کپنڑ  ٹُر پووِن ہا 

گھاء  اچ ڈوہیں  ،گونگلو وی  کھاوِن  ہا بیٹھے 

ڈاتری نال یا ول ڈنداں نال چھِل  کے

تے اڈور پڈور دیاں بٹاں وی لاون ہا بیٹھے 💓

اچھا بیا منظر وی ڈاہڈا سوہنڑاں ہوندا ہا ،ڈاڈا جیڑھے ویلے ،کھیر ،ڈوہندا بیٹھا ہووے ہا ،ت پوترا نال بیٹھا ہوندا ،ہا

ڈاڈ منجھ یا گاں دا ،پاندا ،ضرور پلیندا ہا  ہک تھنڑ دا ،پوترے کوں ،

ڈاڈا بھاویں چٹے سفید کپڑے پاتی کھڑا ہووے ہا ،پر پوترا مٹی نال گچ ہتھاں ،پیراں سمیت چمبنڑ ونجے ہا  ،ڈاڈا کھلدیں ہوئیں مونڈے ت بلھا گھنے ہا ،یا ول بیٹھا ہووے ہا  ت جھولی ایچ لُکا گھنے ہا ،

ڈاڈی پِٹ  پِٹ تھک پووے ہا ،اوے چٹے کپڑیاں کوں دانگ لگ ویسن پر  ڈاڈا پوترا ہک کن ایچوں سنڑ کے ڈوجھا کن پہلے کھولی کھڑے ہوندے ہن،،🤓کھِل کھل بٹوور تھیون ہا ڈاڈا پوترا نال ڈاڈی دی کاوڑ تے بُڑ بُڑ دی نقل کرن ہا ۔

کہیں جا آنوڑاں ونجڑاں ہووے ہا ڈاڈا،پوترے کولوں  ڈاہڈی کنی مروڑے ہا جو ایکوں نال نینوڑاں (ساتھ لے جانا) پوسی ،

پر پوترا دھمال پا ڈیندا ہا جو میں ڈاڈے دے نال ویساں ،

ول ڈاڈے کوں نال گھن ونجڑاں پوندا ہا جے پندھ نال دا ہووے ہا تاں ،جے پندھ دور دا ہووے ہا ت ول لک چھپ کے ونجڑاں پوندا ہا ڈاڈے کوں۔ 🤓

تے واپسی ت ڈاڈا چادر دی ،ٹیبک،(چادر کا پلو سمجھ لیں)ایچ پوترے کیتے ،ریوڑیاں ،،گجک ،مرونڈا ،یا ول توشہ ،کئی نا کئی شے ضرور لُکائی ودا ہوندا ہا ت ول رُٹھے ہوئے پوترے کو لاڈ گوڈمے نال شئے ،ڈے کے مناوے ہا ❤️

روٹی کھاونڑ دے ویلے ڈاڈے نال بھئی والی ہوندی ہائی پوترے دی ،بھاویں جو پہلے کھادی بیٹھا ہووے ہا رج کے ول وی ڈاڈے نال ضرور حصہ وصول کرے ہا ،، ،جیہو سویں ہتھ ہوون ،بوڈا ،لم ،،واہندا کھڑا ہوے ہا ،پر ڈاڈا کرییت کینا کریندا ہا، نال بلھا کے اپنڑی منجھلی دی ٹیبک کھول کے لم پونجھے ہا ،ت ول نکے نکے گِراہں  (نوالہ )بنڑا کے ہر گراہں نال مکھنڑ ولہیٹ کے پوترے کوں کھواوے ہا۔ 😍

ہنڑ تے او ویلا او ڈاڈا تے او پوترا 

بہوں گھٹ نظردن ہکو جاء کٹھے

وسیب اچ ڈاڈے تے اجاں وی بہوں ہن

تے پوتریاں کو ڈیکھنڑ کیتے سکدن  پوترے وی ہر جاہ ہن ،

پر ارمان اے ہے جو ہنڑ ڈاڈا ،پوترا کٹھے نی تھیندے ہکو جاء بہوں گھٹ باہنن،رل مل کے کھاونڑ پیونڑ وی بہوں گھٹ تھی گے ،لاڈ گوڈمے وی اصلوں گھٹ تھی گئن ،، پوترے موبائلاں ویچ گم تھی گئن ،ت ڈاڈے  ڈکھاں دیاں قبراں ویچ گم تھیندے  وینن اپنڑیں ارماناں سمیت ،

بس کتھائیں کتھائیں اج وی ڈاڈا پوترا ہکو جاہ لبھ پونن ،کھلدے ہوئے بٹاں مریندے ہوئے ،ایہو جیاں منظر ڈیکھ کے روح تک خوشی دی ایہو جئیں لہر پوندی ہے جیندے نال دنیا دی بئی کوئی خوشی مقابلا نی کر سگدی ،

فیاض حسین بخاری