اللہ چپ اے سوہنڑاں چُپ اے
کھول کتاباں ورقے ڈٹھم
مسجد ڈٹھم مندر ڈٹھم
ہند وی ڈِٹھم سندھ وی ڈٹھم
گنگا ،جمنا ،گوتے ،،کھادِم
ست سمندر پار وی ڈٹھم
کعبے دوں وی جھاتی پاتم
اللہ چپ اے سو ہنڑاں چپ اے
ایڈے اُوڈے ہکلاں مارِیم
کُوکاں ماریم چیکاں ماریم
دھاڑیں مار کے پِٹکا پاتِم
رو رو دھاں فریاد وی کیتِم
تیکوں میکوں آکھ کے ڈٹھم
ہنّجواں دے کئی ہار وی پاتم
اللہ چُپ اے سوہنڑاں چُپ ،،اے
مِنتاں کیتم ترلے پاتم
مٹی اُتے سجدے کیتم
لِیکے چِھکم ہَاڑھے پاتم
دعوت کیتم صدقے ڈتم
کِھل کے ڈِٹھم ہتھ وی بَدھم
آسوں پاسوں بَھؤں کے ڈِٹھم ،
اللہ چپ اے سوہنڑاں چپ اے
اپڑیں اندر جھاتی پاتم
غلطی اتے غلطی ڈٹھم
غسل کیتم وضو کیتم
ول ول رو رو توبہ کیتم
کوشش کیتم ہمت کیتم
حسن حسین دے ناویں پاتم
اللہ چپ اے سوہنڑاں چپ اے
کُوڑیاں سچیاں اکھیں نُوٹیم
مرنڑ دا میں ناٹک کیتم
قاصد دے ہتھ ورقے بھیجِم
ہک ہک حال مفصل ڈتم
واپس آ کے قاصد آکھے
نوری چپ اے ناری چپ اے
اللہ چپ اے سوہنڑاں چپ اے
اج توں بعد فیاضنڑ چپ اے
🙏فیاض بخاری
{گوتے^غوطے }،،{پِٹکا ،،ماتم)لیکے ،،لکیریں ،فیاضنڑ ،تحقیرسے بگڑا نام